Preséntase Retomando a palabra, de David Rodríguez
A próxima sexta-feira 27 de xaneiro, ás 20h. na Libraría Couceiro de Santiago de Compostela, Estaleiro Editora organiza a primeira presentación pública de Retomando a palabra. Das guerras culturais ao crac financeiro, asinado polo escritor vigués David Rodríguez. No acto estará acompañado polo escritor e analista político Manuel M. Barreiro e por Isaac Lourido, en representación da editora. O libro contén unha selección dos artigos publicados por Rodríguez no blogue O Funambulista Coxo entre xuño de 2007 e outubro de 2009, revisados para a publicación en papel e acompañados dun epílogo que actualiza as posicións do autor.
Desde os seus comezos en 2005 O Funambulista Coxo vén constituíndo unha referencia no mundo dos blogues galegos. A súa orientación cara á análise política e cultural, sen renunciar nunca á intervención en asuntos da actualidade galega, forneceulle un bo número de seguidores no medio dixital. En Retomando a palabra comparece a análise das condicións económicas e financeiras que propiciaron a crise do capitalismo, así como a preocupación polos asuntos centrais da vida política nos meses anteriores e posteriores ao cambio de goberno na Xunta de Galicia en 2009. Desde as coordenadas da esquerda, a obra constitúe ao mesmo tempo unha crónica e unha certeira análise dun período fundamental para comprender o escenario actual nas súas dimensións política, económica e cultural.
A traxectoria literaria de David Rodríguez (Vigo, 1975) abrangue distintos xéneros. Foi galardoado co I Premio Diario Cultural de Teatro Radiofónico no ano 2007 pola obra O bambán e acadou a condición de finalista no mesmo certame en 2010. Como poeta publicou Lapidarias. Os versos escuros en 2010, e na súa condición de pensador e ensaísta participou nos libros colectivos Non conciliados. Argumentos para a resistencia cultural (2010) e A praza é nosa. Quen constrúe a democracia? (2011).
Comments off
